गणेश प्रसाद तिमिल्सिना

पूर्व अध्यक्ष, राष्ट्रिय सभा

बाट : मोदी गाउँपालिका ७, राम्जा देउराली

गणेशप्रसाद तिमिल्सिना पर्वतको तत्कालिन राम्जा देउराली गाविसस्थित मध्यमवर्गीय किसान परिवारमा जन्मनुभएको हो । उहाँले २०३७ सालमा राम्जास्थित पशुपति माध्यमिक विद्यालयबाट एसएलसी पास गर्नुभयो भने पोखरास्थित पृथ्वी नारायण क्याम्पसबाट व्यवस्थापन विषयमा स्नातक तहसम्म अध्ययन गर्नुभयो ।

पञ्चायतकालमा राजनीतिमा सक्रिय रहनुभएकाले २०४२ साल साउनदेखि २०४६ साउनसम्म जेल जीवन व्यतीत गर्नुभयो । २०४६ सालको जनआन्दोलनपछि बहुदलीय व्यवस्था लागू भएपछि उहाँले जिल्लामा सक्रियता बढाउँदै २०४९ सालको स्थानीय निर्वाचनमा राम्जा देउराली गाविस अध्यक्ष र २०५४ सालको निर्वाचनमा पुनः अध्यक्ष बन्नुभयो । त्यसपछि जिल्ला सभापति समेत निर्वाचित हुनुभयो ।

२०५४ सालमा एमालेको वैकल्पिक केन्द्रीय सदस्य, २०६४ सालको आठौं महाधिवेशनबाट केन्द्रीय सदस्य र नवौं महाधिवेशनपछि पोलिटब्यूरो सदस्य हुँदै गण्डकी प्रदेश सह–इञ्चार्ज बन्नुभयो ।

नेपालको संविधान २०७२ अनुसार संघीय संसदमा दुई सदनात्मक व्यवस्था भएपछि बनेको राष्ट्रिय सभामा गण्डकी प्रदेशको प्रतिनिधित्व गर्दै उहाँ २०७४ फागुन ३० गते राष्ट्रिय सभा अध्यक्ष निर्वाचित हुनुभयो । गाउँदेखि राष्ट्रिय सभा अध्यक्षसम्मको यात्रामा उहाँले जिल्लादेखि देशभर पुर्‍याएको योगदान प्रशंसनीय मानिन्छ ।

• बुबाको नामः तुलसीप्रसाद तिमिल्सिना
• आमाको नामः हिरादेवी तिमिल्सिना
• मोवाइल नं: ९८५१२५००३७
• इमेल: ganeshtimilsina74@gmail.com